hai asliyat ki mera husn-e-zan nahin malum

hai asliyat ki mirā husn-e-zan nahīñ ma.alūm

huā hai kaun ye juzv-e-badan nahīñ ma.alūm

nafas nafas meñ dhueñ kā gumān hotā hai

kahāñ chhupā hai vo sho.ala-fagan nahīñ ma.alūm

kahāñ se aa.ī hai aisī chamak-damak un meñ

ye kaun log haiñ gul-pairahan nahīñ ma.alūm

shu.ūr-e-zīst na iz.hār-e-mudda.ā-e-hayāt

kalām karte haiñ tarz-e-suḳhan nahīñ ma.alūm

ġhazab ḳhudā kā masīhā-e-ahl-e-fan vo haiñ

jinheñ nazākat-e-arbāb-e-fan nahīñ ma.alūm

na tāb-e-dasht-navardī na shahriyat kī umang

mirā junūñ ho kahāñ ḳhema-zan nahīñ ma.alūm

ba-qadr-e-hausla 'hāmid' ġhazal-sarā huuñ maiñ

ijāra-dārī-e-arbāb-e-fan nahīñ ma.alūm

hai asliyat ki mera husn-e-zan nahin malum

hua hai kaun ye juzw-e-badan nahin malum

nafas nafas mein dhuen ka guman hota hai

kahan chhupa hai wo shoala-fagan nahin malum

kahan se aai hai aisi chamak-damak un mein

ye kaun log hain gul-pairahan nahin malum

shuur-e-zist na izhaar-e-muddaa-e-hayat

kalam karte hain tarz-e-suKHan nahin malum

ghazab KHuda ka masiha-e-ahl-e-fan wo hain

jinhen nazakat-e-arbab-e-fan nahin malum

na tab-e-dasht-nawardi na shahriyat ki umang

mera junun ho kahan KHema-zan nahin malum

ba-qadr-e-hausla 'hamid' ghazal-sara hun main

ijara-dari-e-arbab-e-fan nahin malum