hai bad bala kisi ko gham-e-jawedan na ho

hai bad balā kisī ko ġham-e-jāvedāñ na ho

yā ham na hoñ jahāñ meñ ḳhudā yā jahāñ na ho

ā.īn-e-ahl-e-ishq kahāñ aur ham kahāñ

ai aah shola-bār na ho ḳhūñ-chakāñ na ho

fel-e-hakīm ain salāh o savāb hai

saaqī agar sharāb na de sargirāñ na ho

tadbīr tark-e-dushman-e-jāñ kī hai raat din

kis tarah phir mujhe gila-e-dostāñ na ho

kyā vo mata'a jis kī na ho koī ghaat meñ

Dartā huuñ maiñ jo duzd pas-e-kārvāñ na ho

jab tak faroġh-e-mai se na ho siina nūr-zār

hargiz harīf-e-mai-kada asrār-dāñ na ho

lāzim hai yaar bhī to ho betāb varna kyā

vo ishq hai ki ranj yahāñ ho vahāñ na ho

nāhaq vo jī jalāte haiñ saudā-e-ishq par

jin ko ye soch hai ki kuchh is meñ ziyāñ na ho

ham bū-e-dost tujh ko suñghā.eñge 'sheftā'

mahv-e-shamīm turra-e-ambar-fishāñ na ho

hai bad bala kisi ko gham-e-jawedan na ho

ya hum na hon jahan mein KHuda ya jahan na ho

aain-e-ahl-e-ishq kahan aur hum kahan

ai aah shola-bar na ho KHun-chakan na ho

fel-e-hakim ain salah o sawab hai

saqi agar sharab na de sargiran na ho

tadbir tark-e-dushman-e-jaan ki hai raat din

kis tarah phir mujhe gila-e-dostan na ho

kya wo mata'a jis ki na ho koi ghat mein

Darta hun main jo duzd pas-e-karwan na ho

jab tak farogh-e-mai se na ho sina nur-zar

hargiz harif-e-mai-kada asrar-dan na ho

lazim hai yar bhi to ho betab warna kya

wo ishq hai ki ranj yahan ho wahan na ho

nahaq wo ji jalate hain sauda-e-ishq par

jin ko ye soch hai ki kuchh is mein ziyan na ho

hum bu-e-dost tujh ko sunghaenge 'shefta'

mahw-e-shamim turra-e-ambar-fishan na ho