hai bapa ek hashr sa diwar par

hai bapā ik hashr sā dīvār par

kaun paḌhtā hai likhā dīvār par

maiñ ne pūchhā kyā pas-e-dīvār hai

us ne likkhā dā.era dīvār par

aao ādāb-e-mohabbat siikh lo

likh diyā hai zābta dīvār par

ab na chhā.egā tilism-e-tīrgī

chhoḌ aayā huuñ diyā dīvār par

sar uThātī sar paTaḳhtī hai nadī

muskurātā hai ghaḌā dīvār par

chhoḌ dī terī galī terā nagar

paḌh chukā huuñ faisla dīvār par

phir koī āñgan hai kam lagne lagā

phir khaḌā hai mas.ala dīvār par

is liye 'ausāf' chhoḌ aayā huuñ ghar

phir na guzre sāneha dīvār par

hai bapa ek hashr sa diwar par

kaun paDhta hai likha diwar par

main ne puchha kya pas-e-diwar hai

us ne likkha daera diwar par

aao aadab-e-mohabbat sikh lo

likh diya hai zabta diwar par

ab na chhaega tilism-e-tirgi

chhoD aaya hun diya diwar par

sar uThati sar paTaKHti hai nadi

muskuraata hai ghaDa diwar par

chhoD di teri gali tera nagar

paDh chuka hun faisla diwar par

phir koi aangan hai kam lagne laga

phir khaDa hai masala diwar par

is liye 'ausaf' chhoD aaya hun ghar

phir na guzre saneha diwar par