hai be-KHud wasl mein dil hijr mein muztar siwa hoga

hai be-ḳhud vasl meñ dil hijr meñ muztar sivā hogā

ḳhushī jis ghar kī aisī hai vahāñ kā rañj kyā hogā

abhī to yaar se kahne kī dil meñ bāteñ haiñ lākhoñ

na kuchh yaad aa.egā us vaqt jis dam sāmnā hogā

mire madfan kī miTTī kā vo khichvā.eñge itr aksar

agar bū-e-vafā kā un ke dil meñ kuchh mazā hogā

vo gesū baḌhte jaate haiñ balā.eñ hotī haiñ nāzil

qadam tak aa ga.e jab hashr aalam meñ bapā hogā

ġhazab karte ho mere dil ko abrū se chhuḌāte ho

bhalā samjho to kyūñkar gosht nāḳhun se judā hogā

adam meñ merā kyā kyā dam rukegā ek muddat tak

na.ī bastī na.ī poshāk hogī ghar nayā hogā

utārā ḳhuun ke dariyā se hogā sarfaroshoñ kā

banegī teġh kashtī aur qātil nāḳhudā hogā

bayāñ thā roz-e-avval ye mire dil kī udāsī kā

baḌī us ghar kī ābādī ye hai mātam-sarā hogā

ḳhabar le bāġhbāñ hai kis ġhazab kā habs gulshan meñ

havā hai band asīrān-e-qafas kā dam rukā hogā

mire siine se dil ke TūTne kī kyuuñ sadā aa.ī

magar yaañ haath se saaqī ke shīsha gir paḌā hogā

sitamgar aa.egā aksar ḳhabar lene ko zindāñ meñ

hameñ vo beḌiyāñ pahnā ke pāband-e-vafā hogā

raqīboñ kī umīdoñ ko jagah dete haiñ dil meñ ham

ki un meñ se koī āḳhir hamārā mudda.ā hogā

nahīñ hai jis meñ terā ishq vo dil hai tabāhī meñ

vo kashtī Duub jā.egī na jis meñ nāḳhudā hogā

'rashīd' ulfat se jab vāqif na the aksar ye kahte the

na dil se ham judā hoñge na ham se dil judā hogā

hai be-KHud wasl mein dil hijr mein muztar siwa hoga

KHushi jis ghar ki aisi hai wahan ka ranj kya hoga

abhi to yar se kahne ki dil mein baaten hain lakhon

na kuchh yaad aaega us waqt jis dam samna hoga

mere madfan ki miTTi ka wo khichwaenge itr aksar

agar bu-e-wafa ka un ke dil mein kuchh maza hoga

wo gesu baDhte jate hain balaen hoti hain nazil

qadam tak aa gae jab hashr aalam mein bapa hoga

ghazab karte ho mere dil ko abru se chhuDate ho

bhala samjho to kyunkar gosht naKHun se juda hoga

adam mein mera kya kya dam rukega ek muddat tak

nai basti nai poshak hogi ghar naya hoga

utara KHun ke dariya se hoga sarfaroshon ka

banegi tegh kashti aur qatil naKHuda hoga

bayan tha roz-e-awwal ye mere dil ki udasi ka

baDi us ghar ki aabaadi ye hai matam-sara hoga

KHabar le baghban hai kis ghazab ka habs gulshan mein

hawa hai band asiran-e-qafas ka dam ruka hoga

mere sine se dil ke TuTne ki kyun sada aai

magar yan hath se saqi ke shisha gir paDa hoga

sitamgar aaega aksar KHabar lene ko zindan mein

hamein wo beDiyan pahna ke paband-e-wafa hoga

raqibon ki umidon ko jagah dete hain dil mein hum

ki un mein se koi aaKHir hamara muddaa hoga

nahin hai jis mein tera ishq wo dil hai tabahi mein

wo kashti Dub jaegi na jis mein naKHuda hoga

'rashid' ulfat se jab waqif na the aksar ye kahte the

na dil se hum juda honge na hum se dil juda hoga