hai dhyan jo apna kahin ai mah-jabin aur

hai dhyān jo apnā kahīñ ai māh-jabīñ aur

jaanā hai kahīñ aur to jaatā huuñ kahīñ aur

jab tū hī kare dushmanī ham se to ġhazab hai

tere to sivā apnā koī dost nahīñ aur

maiñ hashr ko kyā ro.uuñ ki uTh jaate hī tere

barpā huī ik mujh pe qayāmat to yahīñ aur

va.ada to tire aane kā hai sach hī va-lekin

baazū ke phaḌakne se huā dil ko yaqīñ aur

āḳhir tū kahāñ kūcha tirā aur kahāñ ham

kar leveñ yahāñ baiTh ke ik āh-e-hazīñ aur

thā rū-e-zamīñ tañg zi-bas ham ne nikālī

rahne ke liye sher ke aalam meñ zamīñ aur

naam apnā likhāve to likhā dil pe tū mere

is naam ko behtar nahīñ is se to nagīñ aur

abrū kī to thī chiin mire dil pe ġhazab par

mizhgāñ se numūdār hue ḳhanjar-e-kīñ aur

nikle to usī kūcha se ye gum-shuda nikle

DhūñDhe hai 'hasan' dil ko to phir DhūñD vahīñ aur

hai dhyan jo apna kahin ai mah-jabin aur

jaana hai kahin aur to jata hun kahin aur

jab tu hi kare dushmani hum se to ghazab hai

tere to siwa apna koi dost nahin aur

main hashr ko kya roun ki uTh jate hi tere

barpa hui ek mujh pe qayamat to yahin aur

wada to tere aane ka hai sach hi wa-lekin

bazu ke phaDakne se hua dil ko yaqin aur

aaKHir tu kahan kucha tera aur kahan hum

kar lewen yahan baiTh ke ek aah-e-hazin aur

tha ru-e-zamin tang zi-bas hum ne nikali

rahne ke liye sher ke aalam mein zamin aur

nam apna likhawe to likha dil pe tu mere

is nam ko behtar nahin is se to nagin aur

abru ki to thi chin mere dil pe ghazab par

mizhgan se numudar hue KHanjar-e-kin aur

nikle to usi kucha se ye gum-shuda nikle

DhunDhe hai 'hasan' dil ko to phir DhunD wahin aur