hai dukan-e-shauq bhari hui koi mehrban ho to le ke aa

hai dukān-e-shauq bharī huī koī mehrbāñ ho to le ke aa

zar dāġh-e-dil kā savāl hai koī naqd-e-jāñ ho to le ke aa

rahī ye fazā to jiyeñge kyā koī ab binā-e-digar uThā

koī ho zamīñ to nikāl use koī āsmāñ ho to le ke aa

jo ho zauq-e-dard kā ye samāñ to uchhāl de koī āsmāñ

tire dāġh-e-dil mah-o-mehr meñ kahīñ kahkashāñ ho to le ke aa

ye hai shaam mausam-e-dard kī ye hai sub.h chehra-e-zard kī

hai bahār par ġham-e-zindagī koī dil-ḳhizāñ ho to le ke aa

ye safar hai manzil-e-shauq kā koī ham-safar koī ham-rahī

kisī dil-shikasta ko saath le koī sargirāñ ho to le ke aa

yūñhī apne aap se guftugū jo rahī to phir na rahegā tū

koī ham-ḳhayāl talāsh kar koī ham-zabāñ ho to le ke aa

zarā ḳhud se 'bāqar'-e-be-navā tū nikal ki tai ho mo.āmla

inheñ mil ye log haiñ ahl-e-dil ġham-e-rā.egāñ ho to le ke aa

hai dukan-e-shauq bhari hui koi mehrban ho to le ke aa

zar dagh-e-dil ka sawal hai koi naqd-e-jaan ho to le ke aa

rahi ye faza to jiyenge kya koi ab bina-e-digar uTha

koi ho zamin to nikal use koi aasman ho to le ke aa

jo ho zauq-e-dard ka ye saman to uchhaal de koi aasman

tere dagh-e-dil mah-o-mehr mein kahin kahkashan ho to le ke aa

ye hai sham mausam-e-dard ki ye hai subh chehra-e-zard ki

hai bahaar par gham-e-zindagi koi dil-KHizan ho to le ke aa

ye safar hai manzil-e-shauq ka koi ham-safar koi ham-rahi

kisi dil-shikasta ko sath le koi sargiran ho to le ke aa

yunhi apne aap se guftugu jo rahi to phir na rahega tu

koi ham-KHayal talash kar koi ham-zaban ho to le ke aa

zara KHud se 'baqar'-e-be-nawa tu nikal ki tai ho moamla

inhen mil ye log hain ahl-e-dil gham-e-raegan ho to le ke aa