hai haram kis ka kis ke but-KHane

hai haram kis kā kis ke but-ḳhāne

is ko samjhe haiñ kuchh to dīvāne

zindagī kā mazā vo kyā jaane

ġham diye hoñ na jis ko duniyā ne

chashm-e-maḳhmūr haiñ vo paimāne

jin pe qurbāñ hazār maiḳhāne

hosh aa.e na tujh ko dīvāne

pī mohabbat ke aise paimāne

us ko dair-o-haram se kyā matlab

naqsh-e-pā ko jo un ke pahchāne

phir taqāzā hai vahshat-e-dil kā

kar garebāñ ko chaak dīvāne

rah ga.e ḳhud ulajh ke āḳhir-kār

rāz-e-hastī chale the suljhāne

sar uThe phir na sub.h-e-mahshar tak

sar jhukā is tarah se farzāne

dard-e-ulfat se jo nahīñ vāqif

mujh ko aa.e haiñ vo hī samjhāne

kyā mohabbat ke bhī karishme haiñ

sham.a ik hai hazār parvāne

us ke jalve haiñ zarre zarre meñ

dekh dair-o-haram ke dīvāne

ham bhī aa.e haiñ mai-kade meñ 'shafī.a'

apne ġhamgīn dil ko bahlāne

hai haram kis ka kis ke but-KHane

is ko samjhe hain kuchh to diwane

zindagi ka maza wo kya jaane

gham diye hon na jis ko duniya ne

chashm-e-maKHmur hain wo paimane

jin pe qurban hazar maiKHane

hosh aae na tujh ko diwane

pi mohabbat ke aise paimane

us ko dair-o-haram se kya matlab

naqsh-e-pa ko jo un ke pahchane

phir taqaza hai wahshat-e-dil ka

kar gareban ko chaak diwane

rah gae KHud ulajh ke aaKHir-kar

raaz-e-hasti chale the suljhane

sar uThe phir na subh-e-mahshar tak

sar jhuka is tarah se farzane

dard-e-ulfat se jo nahin waqif

mujh ko aae hain wo hi samjhane

kya mohabbat ke bhi karishme hain

shama ek hai hazar parwane

us ke jalwe hain zarre zarre mein

dekh dair-o-haram ke diwane

hum bhi aae hain mai-kade mein 'shafia'

apne ghamgin dil ko bahlane