hai jab se dast-e-yar mein saghar sharab ka

hai jab se dast-e-yār meñ sāġhar sharāb kā

kauḌe kā ho gayā hai kaTorā gulāb kā

sayyād ne tasallī-e-bulbul ke vāste

kunj-e-qafas meñ hauz bharā hai gulāb kā

dariyā-e-ḳhūñ kiyā hai tirī teġh ne ravāñ

hāsil huā hai rutba saroñ ko hubāb kā

jo satr hai vo gasū-e-hūr-e-bahisht hai

ḳhāl-e-parī hai nuqta hamārī kitāb kā

nau āsmāñ haiñ saf.ha-e-avval ke nau luġhat

kaunain ik do varqa hai apnī kitāb kā

ai mauj-e-be-lihāz samajh kar miTā.īyo

dariyā bhī hai asiir tilism-e-hubāb kā

bichhvā.īye na chāñdnī meñ baam par palañg

manhūs hai qirān mah o āftāb kā

ik tark shahsavār kī dīvānī ruuh hai

zanjīr meñ hamāre ho lohā rikāb kā

husn-o-jamāl se hai zamāne meñ raushnī

shab māhtāb kī hai to roz āftāb kā

allāh-re hamārā takalluf shab-e-visāl

roġhan ke badle itr jalāyā gulāb kā

masjid se mai-kade meñ mujhe nashsha le gayā

mauj-e-sharāb jaada thī rāh-e-savāb kā

insāf se vo zamzama merā agar sune

dam band hove tūtī-e-hāzir-javāb kā

ulfat jo zulf se hai dil-e-dāġh-dār ko

tā.ūs ko ye ishq na hogā sahāb kā

ma.amūr jo huā araq-e-ruḳh se vo zaqan

mazmūn mil gayā mujhe chāh-e-gulāb kā

paatā huuñ naaf kā kamar-e-yār meñ maqām

chashma magar adam meñ hai gauhar kī aab kā

'ātish' shab-e-firāq meñ pūchhūñgā maah se

ye daaġh hai diyā huā kis āftāb kā

hai jab se dast-e-yar mein saghar sharab ka

kauDe ka ho gaya hai kaTora gulab ka

sayyaad ne tasalli-e-bulbul ke waste

kunj-e-qafas mein hauz bhara hai gulab ka

dariya-e-KHun kiya hai teri tegh ne rawan

hasil hua hai rutba saron ko hubab ka

jo satr hai wo gasu-e-hur-e-bahisht hai

KHal-e-pari hai nuqta hamari kitab ka

nau aasman hain safha-e-awwal ke nau lughat

kaunain ek do warqa hai apni kitab ka

ai mauj-e-be-lihaz samajh kar miTaiyo

dariya bhi hai asir tilism-e-hubab ka

bichhwaiye na chandni mein baam par palang

manhus hai qiran mah o aaftab ka

ek tark shahsawar ki diwani ruh hai

zanjir mein hamare ho loha rikab ka

husn-o-jamal se hai zamane mein raushni

shab mahtab ki hai to roz aaftab ka

allah-re hamara takalluf shab-e-visal

roghan ke badle itr jalaya gulab ka

masjid se mai-kade mein mujhe nashsha le gaya

mauj-e-sharab jada thi rah-e-sawab ka

insaf se wo zamzama mera agar sune

dam band howe tuti-e-hazir-jawab ka

ulfat jo zulf se hai dil-e-dagh-dar ko

taus ko ye ishq na hoga sahab ka

mamur jo hua araq-e-ruKH se wo zaqan

mazmun mil gaya mujhe chah-e-gulab ka

pata hun naf ka kamar-e-yar mein maqam

chashma magar adam mein hai gauhar ki aab ka

'atish' shab-e-firaq mein puchhunga mah se

ye dagh hai diya hua kis aaftab ka