hai jo KHamosh but-e-hosh-ruba mere baad

hai jo ḳhāmosh but-e-hosh-rubā mere baad

gul khilā.egā koī aur nayā mere baad

tū jafāoñ se jo badnām kiye jaatā hai

yaad aa.egī tujhe merī vafā mere baad

koī shikva ho sitamgār to zāhir kar de

phir na karnā tū kabhī koī gila mere baad

ibrat-añgez hai afsāna mire marne kā

ruk ga.e haiñ qadam-e-umr-e-baqā mere baad

zamzame ḳhāna-e-sayyād ke kyuuñ gūñjte haiñ

kyā koī taaza giraftār huā mere baad

sar ke bal ishq kī manzil ko kiyā tai maiñ ne

nahīñ milte jo nishān-e-kaf-e-pā mere baad

'sābir'-e-ḳhasta ko har haal meñ yā rab rakh shaad

kahīñ aisā na ho ho sabr fanā mere baad

hai jo KHamosh but-e-hosh-ruba mere baad

gul khilaega koi aur naya mere baad

tu jafaon se jo badnam kiye jata hai

yaad aaegi tujhe meri wafa mere baad

koi shikwa ho sitamgar to zahir kar de

phir na karna tu kabhi koi gila mere baad

ibrat-angez hai afsana mere marne ka

ruk gae hain qadam-e-umr-e-baqa mere baad

zamzame KHana-e-sayyaad ke kyun gunjte hain

kya koi taza giraftar hua mere baad

sar ke bal ishq ki manzil ko kiya tai main ne

nahin milte jo nishan-e-kaf-e-pa mere baad

'sabir'-e-KHasta ko har haal mein ya rab rakh shad

kahin aisa na ho ho sabr fana mere baad