hai jo kuchh pas apne sab liye sarkar baiThe hain

hai jo kuchh paas apne sab liye sarkār baiThe haiñ

jo chāheñ aap le jaa.eñ sar-e-bāzār baiThe haiñ

manāo jashn manzil par pahuñch jaane kā tum lekin

ḳhabar un kī bhī lo yaaro jo himmat haar baiThe haiñ

tū ab us shahr bhī jā kar sukūñ pā.egā kyā āḳhir

vahāñ bhī kaun se ai dil tire ġham-ḳhvār baiThe haiñ

na tū aayā na yaad aa.ī tirī ik lambe arse se

hazāroñ kaam hone par bhī ham be-kār baiThe haiñ

inhīñ se naam hai terā na bhuul itnā ai ye saaqī

tire maiḳhāne meñ ab bhī kuchh ik ḳhuddār baiThe haiñ

ga.e vo vaqt kahte the ki itne dost haiñ apne

muqaddar jāniye achchhā agar do-chār baiThe haiñ

kisī bhī vaqt aa saktā hai ab paiġhām bas us kā

sunā jis vaqt se ham ne 'salīl' tayyār baiThe haiñ

hai jo kuchh pas apne sab liye sarkar baiThe hain

jo chahen aap le jaen sar-e-bazar baiThe hain

manao jashn manzil par pahunch jaane ka tum lekin

KHabar un ki bhi lo yaro jo himmat haar baiThe hain

tu ab us shahr bhi ja kar sukun paega kya aaKHir

wahan bhi kaun se ai dil tere gham-KHwar baiThe hain

na tu aaya na yaad aai teri ek lambe arse se

hazaron kaam hone par bhi hum be-kar baiThe hain

inhin se nam hai tera na bhul itna ai ye saqi

tere maiKHane mein ab bhi kuchh ek KHuddar baiThe hain

gae wo waqt kahte the ki itne dost hain apne

muqaddar jaaniye achchha agar do-chaar baiThe hain

kisi bhi waqt aa sakta hai ab paigham bas us ka

suna jis waqt se hum ne 'salil' tayyar baiThe hain