hai karwan ka shor sar-e-rahguzar uTha

hai kārvāñ kā shor sar-e-rahguzar uThā

jaanā hai gar tujhe bhī to raḳht-e-safar uThā

tārīkiyoñ meñ vaqt kī raqs-e-sharar uThā

ḳhāmosh farsh-e-āb pe tū bhī lahar uThā

shabnam haqīr tere liye hai shuā-e-mehr

laale ke dast-e-nāz se phir kyoñ guhar uThā

ḳhīra hai aañkh terī yahāñ zulmatoñ se kyoñ

niklā hai āftāb zarā tū nazar uThā

gardish hai mehr-o-māh kī zanjīr ban ga.ī

baḌh kar tū aaj parda-e-shām-o-sahar uThā

nākāmiyoñ se Dartī haiñ himmat kī pastiyāñ

zarroñ pe kyoñ nazar hai tū baḌh kar guhar uThā

saa.e se apne kis liye Dartā hai is qadar

koī nahīñ hai teġh zarā apnā sar uThā

apnī fuġhāñ bhī ai lab-e-ḳhāmosh kar buland

saare jahāñ meñ kaisā hai ye shor-o-shar uThā

piite raheñge ḳhūn-e-tamannā hī kab talak

ab mai-kade meñ jaam ba-tarz-e-digar uThā

nazreñ ye kis se vaqt ke aamir ne pher liiñ

neze pe aaj dekhiye kis kā ye sar uThā

hai karwan ka shor sar-e-rahguzar uTha

jaana hai gar tujhe bhi to raKHt-e-safar uTha

tarikiyon mein waqt ki raqs-e-sharar uTha

KHamosh farsh-e-ab pe tu bhi lahar uTha

shabnam haqir tere liye hai shua-e-mehr

lale ke dast-e-naz se phir kyon guhar uTha

KHira hai aankh teri yahan zulmaton se kyon

nikla hai aaftab zara tu nazar uTha

gardish hai mehr-o-mah ki zanjir ban gai

baDh kar tu aaj parda-e-sham-o-sahar uTha

nakaamiyon se Darti hain himmat ki pastiyan

zarron pe kyon nazar hai tu baDh kar guhar uTha

sae se apne kis liye Darta hai is qadar

koi nahin hai tegh zara apna sar uTha

apni fughan bhi ai lab-e-KHamosh kar buland

sare jahan mein kaisa hai ye shor-o-shar uTha

pite rahenge KHun-e-tamanna hi kab talak

ab mai-kade mein jam ba-tarz-e-digar uTha

nazren ye kis se waqt ke aamir ne pher lin

neze pe aaj dekhiye kis ka ye sar uTha