hai lekin ajnabi aisa nahin hai

hai lekin ajnabī aisā nahīñ hai

vo chehra jo abhī dekhā nahīñ hai

bahar-sūrat hai har sūrat izāfī

nazar aatā hai jo vaisā nahīñ hai

ise kahte haiñ andoh-e-ma.ānī

lab-e-naġhma gul-e-naġhma nahīñ hai

lahū meñ mere gardish kar rahā hai

abhī vo harf jo likkhā nahīñ hai

hujūm-e-tishnagāñ hai aur dariyā

samajhtā hai koī pyāsā nahīñ hai

ajab merā qabīla hai ki jis meñ

koī mere qabīle kā nahīñ hai

jahāñ tum ho vahāñ saaya hai merā

jahāñ maiñ huuñ vahāñ saaya nahīñ hai

sar-e-dāmān-e-sahrā khil rahā hai

magar vo phuul jo merā nahīñ hai

mujhe vo shaḳhs zinda kar gayā hai

jise ḳhud apnā andāza nahīñ hai

mohabbat meñ 'rasā' khoyā hī kyā thā

jo ye kahte ki kuchh paayā nahīñ hai

hai lekin ajnabi aisa nahin hai

wo chehra jo abhi dekha nahin hai

bahar-surat hai har surat izafi

nazar aata hai jo waisa nahin hai

ise kahte hain andoh-e-maani

lab-e-naghma gul-e-naghma nahin hai

lahu mein mere gardish kar raha hai

abhi wo harf jo likkha nahin hai

hujum-e-tishnagan hai aur dariya

samajhta hai koi pyasa nahin hai

ajab mera qabila hai ki jis mein

koi mere qabile ka nahin hai

jahan tum ho wahan saya hai mera

jahan main hun wahan saya nahin hai

sar-e-daman-e-sahra khil raha hai

magar wo phul jo mera nahin hai

mujhe wo shaKHs zinda kar gaya hai

jise KHud apna andaza nahin hai

mohabbat mein 'rasa' khoya hi kya tha

jo ye kahte ki kuchh paya nahin hai