hai mere gird yaqinan kahin hisar sa kuchh

hai mere gird yaqīnan kahīñ hisār sā kuchh

aur us ko bhī hai du'āoñ pe e'tibār sā kuchh

kahīñ to gosha-e-dil meñ umiid baaqī hai

kahīñ hai us kī nazar meñ bhī intizār sā kuchh

kahā jab us ne ke āñkhoñ pe e'tibār na kar

to maiñ ne maañg liyā dil pe iḳhtiyār sā kuchh

ye saarā khel faqat gardishoñ kā hai āhang

fuzūl DhūñD rahe ho yahāñ qarār sā kuchh

jo le ke aayā thā sailāb ḳhushbūoñ kā kabhī

vo bhar gayā hai mirī aañkh meñ ġhubār sā kuchh

utar chukā hai badan se tamām nasha-e-vasl

chaḌhā chaḌhā sā tabī'at pe hai ḳhumār sā kuchh

sunā hai ye bhī buzurgī kī ik 'alāmat hai

so maiñ bhī hone lagā 'tāj' ḳhāksār sā kuchh

hai mere gird yaqinan kahin hisar sa kuchh

aur us ko bhi hai du'aon pe e'tibar sa kuchh

kahin to gosha-e-dil mein umid baqi hai

kahin hai us ki nazar mein bhi intizar sa kuchh

kaha jab us ne ke aankhon pe e'tibar na kar

to main ne mang liya dil pe iKHtiyar sa kuchh

ye sara khel faqat gardishon ka hai aahang

fuzul DhunD rahe ho yahan qarar sa kuchh

jo le ke aaya tha sailab KHushbuon ka kabhi

wo bhar gaya hai meri aankh mein ghubar sa kuchh

utar chuka hai badan se tamam nasha-e-wasl

chaDha chaDha sa tabi'at pe hai KHumar sa kuchh

suna hai ye bhi buzurgi ki ek 'alamat hai

so main bhi hone laga 'taj' KHaksar sa kuchh