hai mol-bhao mein bazar mein hai sath mere

hai mol-bhāo meñ bāzār meñ hai saath mire

vo ek kār-e-fanā-zār meñ hai saath mire

salīb-e-jāñ se visāl āsmāñ ke sāhil tak

har ek lazzat-e-āzār meñ hai saath mire

kabhī to hero banātā hai aur kabhī joker

har ek rañg ke kirdār meñ hai saath mire

yahī bahut hai mire jism o jaañ kā hissa hai

kahīñ to mauja-e-ḳhūñ-bār meñ hai saath mire

ajab gumān hai jaise ki sarfarāz huuñ maiñ

ajiib fitna-e-dastār meñ hai saath mire

kabhī mujhe bhī zarā mojaza-numā kartā

jo apnī zaat ke asrār meñ hai saath mire

vo dastaras meñ hai lekin nazar se ġhā.eb hai

harīf-e-jāñ koī paikār meñ hai saath mire

maiñ ik nigāh ko mahsūs kar rahā huuñ mudām

koī to reg-e-fanā-zār meñ hai saath mire

vo saare ḳheme lagātā hai phir ukhāḌtā hai

sarāb-e-manzil-o-āsār meñ hai saath mire

jo chhoḌ detā hai dasht-e-zavāl meñ tanhā

vo rel-pel meñ bāzār meñ hai saath mire

hai mol-bhao mein bazar mein hai sath mere

wo ek kar-e-fana-zar mein hai sath mere

salib-e-jaan se visal aasman ke sahil tak

har ek lazzat-e-azar mein hai sath mere

kabhi to hero banata hai aur kabhi joker

har ek rang ke kirdar mein hai sath mere

yahi bahut hai mere jism o jaan ka hissa hai

kahin to mauja-e-KHun-bar mein hai sath mere

ajab guman hai jaise ki sarfaraaz hun main

ajib fitna-e-dastar mein hai sath mere

kabhi mujhe bhi zara mojaza-numa karta

jo apni zat ke asrar mein hai sath mere

wo dastaras mein hai lekin nazar se ghaeb hai

harif-e-jaan koi paikar mein hai sath mere

main ek nigah ko mahsus kar raha hun mudam

koi to reg-e-fana-zar mein hai sath mere

wo sare KHeme lagata hai phir ukhaDta hai

sarab-e-manzil-o-asar mein hai sath mere

jo chhoD deta hai dasht-e-zawal mein tanha

wo rel-pel mein bazar mein hai sath mere