hai mustaqil yahi ehsas kuchh kami si hai

hai mustaqil yahī ehsās kuchh kamī sī hai

talāsh meñ hai nazar dil ko be-kalī sī hai

kisī bhī kaam meñ lagtā nahīñ hai dil merā

baḌe dinoñ se tabī'at bujhī bujhī sī hai

baḌī 'ajīb udāsī hai muskurātā huuñ

jo āj-kal mirī hālat hai shā'irī sī hai

guzar rahe haiñ shab-o-roz be-sabab mere

ye zindagī to nahīñ sirf zindagī sī hai

thakī to ek mohabbat ne muuñd lī āñkheñ

har ek niiñd se ab merī dushmanī sī hai

tire baġhair kahāñ hai sukūn kyā ārām

kahīñ rahūñ mirī taklīf be-gharī sī hai

nahīñ vo sham'-e-mohabbat rahī to phir 'āsim'

ye kis du'ā se mire ghar meñ raushnī sī hai

hai mustaqil yahi ehsas kuchh kami si hai

talash mein hai nazar dil ko be-kali si hai

kisi bhi kaam mein lagta nahin hai dil mera

baDe dinon se tabi'at bujhi bujhi si hai

baDi 'ajib udasi hai muskuraata hun

jo aaj-kal meri haalat hai sha'iri si hai

guzar rahe hain shab-o-roz be-sabab mere

ye zindagi to nahin sirf zindagi si hai

thaki to ek mohabbat ne mund li aankhen

har ek nind se ab meri dushmani si hai

tere baghair kahan hai sukun kya aaram

kahin rahun meri taklif be-ghari si hai

nahin wo sham'-e-mohabbat rahi to phir 'asim'

ye kis du'a se mere ghar mein raushni si hai