hai nok-e-Khaar mein kuchh wo to sabza-zar mein kuchh

hai nok-e-ḳhār meñ kuchh vo to sabza-zār meñ kuchh

ḳhizāñ meñ kuchh hai magar mausam-e-bahār meñ kuchh

guhar thā maah thā jugnū thā yā sitāra-e-shām

chamak rahā thā tirī chashm-e-ashk-bār meñ kuchh

kahāñ ke vahm-o-gumāñ kā hai silsila mirī ziist

ki us ke paar hī kuchh hai na is hisār meñ kuchh

tamām-umr vahī misl-e-ḳhār chubhte rahe

guzar ga.e the jo pal sāya-e-bahār meñ kuchh

phir is ke ba.ad hai ḳhud par yaqīñ na duniyā par

thī aisī baat hī ik pal ke e'tibār meñ kuchh

maiñ us kī yaad se dāman chhuḌā luuñ mujh ko ḳhayāl

tab aayā jab na rahā mere iḳhtiyār meñ kuchh

na chāhtā vo to raushan na hotī koī bhī shai

hai nuur us kā bhī kyā shām-e-intizār meñ kuchh

hai nok-e-KHar mein kuchh wo to sabza-zar mein kuchh

KHizan mein kuchh hai magar mausam-e-bahaar mein kuchh

guhar tha mah tha jugnu tha ya sitara-e-sham

chamak raha tha teri chashm-e-ashk-bar mein kuchh

kahan ke wahm-o-guman ka hai silsila meri zist

ki us ke par hi kuchh hai na is hisar mein kuchh

tamam-umr wahi misl-e-KHar chubhte rahe

guzar gae the jo pal saya-e-bahaar mein kuchh

phir is ke baad hai KHud par yaqin na duniya par

thi aisi baat hi ek pal ke e'tibar mein kuchh

main us ki yaad se daman chhuDa lun mujh ko KHayal

tab aaya jab na raha mere iKHtiyar mein kuchh

na chahta wo to raushan na hoti koi bhi shai

hai nur us ka bhi kya sham-e-intizar mein kuchh