hai qanun-e-fitrat koi kya karega

hai qānūn-e-fitrat koī kyā karegā

jo hotā hai duniyā meñ ho kar rahegā

na neze pe jab tak tirā sar chaḌhegā

tire sar ko sar koī kaise kahegā

maiñ anjām-e-haq-goī se bā ḳhabar huuñ

pata hai ki ik din mirā sar kaTegā

vahī roTiyāñ jin se chhīnī ga.ī haiñ

agar uTh khaḌe hoñ to kaisā rahegā

tirā husn hai shola-e-āsmānī

koī us se āḳhir kahāñ tak bachegā

yaqīnan kahīñ aaj bijlī giregī

yaqīnan koī āshiyāna jalegā

ye dard-e-mohabbat hai mere masīhā

davā se na koī duā se ghaTegā

mohabbat kī qismat meñ āvārgī hai

kahāñ tak koī us ke pīchhe paḌegā

'valī' jo hai nā-āshna-e-mohabbat

mire dil kī dhaḌkan vo kyuuñ kar sunegā

hai qanun-e-fitrat koi kya karega

jo hota hai duniya mein ho kar rahega

na neze pe jab tak tera sar chaDhega

tere sar ko sar koi kaise kahega

main anjam-e-haq-goi se ba KHabar hun

pata hai ki ek din mera sar kaTega

wahi roTiyan jin se chhini gai hain

agar uTh khaDe hon to kaisa rahega

tera husn hai shola-e-asmani

koi us se aaKHir kahan tak bachega

yaqinan kahin aaj bijli giregi

yaqinan koi aashiyana jalega

ye dard-e-mohabbat hai mere masiha

dawa se na koi dua se ghaTega

mohabbat ki qismat mein aawargi hai

kahan tak koi us ke pichhe paDega

'wali' jo hai na-ashna-e-mohabbat

mere dil ki dhaDkan wo kyun kar sunega