hai qissa muKHtasar mere safar ka

hai qissa muḳhtasar mere safar kā

na paanī hai na saaya hai shajar kā

nahīñ hai jis pe terā naqsh-e-pā tak

bharosa kyā hai aisī zindagī kā

chalā huuñ jānib-e-manzil meñ lekin

nahīñ nām-o-nishāñ tak rahguzar kā

ḳhayāl-e-yār meñ gum ho gayā huuñ

pata maiñ kis se pūchhūñ apne ghar kā

nahīñ sahbā kī azmat se maiñ munkir

ye nasha hai magar hai raat bhar kā

zamāne bhar meñ rusvā ho gayā huuñ

karishma hai ye bas terī nazar kā

'premī' jab bhī jalva-gar vo hogā

badal jā.egā manzar bām-o-dar kā

hai qissa muKHtasar mere safar ka

na pani hai na saya hai shajar ka

nahin hai jis pe tera naqsh-e-pa tak

bharosa kya hai aisi zindagi ka

chala hun jaanib-e-manzil mein lekin

nahin nam-o-nishan tak rahguzar ka

KHayal-e-yar mein gum ho gaya hun

pata main kis se puchhun apne ghar ka

nahin sahba ki azmat se main munkir

ye nasha hai magar hai raat bhar ka

zamane bhar mein ruswa ho gaya hun

karishma hai ye bas teri nazar ka

'premi' jab bhi jalwa-gar wo hoga

badal jaega manzar baam-o-dar ka