hai ruh yaKH-basta ek jauhar libas-e-hasti utarna kya

hai ruuh yaḳh-basta ek jauhar libās-e-hastī utārnā kyā

badan kī nā-bāliġhī salāmat lahū kī garmī ko mārnā kyā

ba-faiz-e-taqdīr apne ajdād hī kā ham dūsrā janam haiñ

jo zindagī ḳhud guzar rahī ho to zindagī ko guzārnā kyā

shab-e-malāmat kī roī āñkho tumhāre ashkoñ ke motiyoñ meñ

jo aab lau de rahī hai us ko parā.e jalvoñ pe vārnā kyā

maiñ raushnī se latīf-tar huuñ magar 'anāsir kī qaid meñ huuñ

abhī mire dil ke but-kade meñ nuqūsh-e-vahdat ubhārnā kyā

mire chaman se bahār kā āḳhirī parinda bhī uḌ chukā hai

bahār hī jab na jiit paa.ī to merā patjhaḌ se hārnā kyā

maiñ ḳhud mudāvā huuñ apnī tanhā.iyoñ kā is hujra-e-balā meñ

purānī yādoñ ke lashkaroñ ko madad kī ḳhātir pukārnā kyā

qadīm jazboñ ke bar meñ 'tālib' jadīd lafzoñ kā pairahan hai

na.e taḳhayyul ko bāñdhnā kyā ġhazal ke gesū sañvārnā kyā

hai ruh yaKH-basta ek jauhar libas-e-hasti utarna kya

badan ki na-baalighi salamat lahu ki garmi ko marna kya

ba-faiz-e-taqdir apne ajdad hi ka hum dusra janam hain

jo zindagi KHud guzar rahi ho to zindagi ko guzarna kya

shab-e-malamat ki roi aankho tumhaare ashkon ke motiyon mein

jo aab lau de rahi hai us ko parae jalwon pe warna kya

main raushni se latif-tar hun magar 'anasir ki qaid mein hun

abhi mere dil ke but-kade mein nuqush-e-wahdat ubhaarna kya

mere chaman se bahaar ka aaKHiri parinda bhi uD chuka hai

bahaar hi jab na jit pai to mera patjhaD se haarna kya

main KHud mudawa hun apni tanhaiyon ka is hujra-e-bala mein

purani yaadon ke lashkaron ko madad ki KHatir pukarna kya

qadim jazbon ke bar mein 'talib' jadid lafzon ka pairahan hai

nae taKHayyul ko bandhna kya ghazal ke gesu sanwarna kya