hai tajjub aaj tak bhi ishq kyon ruswa nahin

hai ta.ajjub aaj tak bhī ishq kyoñ rusvā nahīñ

dard be-āvāz sā hai ġham kā bhī saaya nahīñ

jo huā anjām dīvāne kā vo hotā nahīñ

vo samajh jaatā magar kuchh ham ne samjhāyā nahīñ

mere kamre kī bhī dīvāroñ se ye pūchhe koī

koī kyā jaane ki maiñ kyoñ raat bhar soyā nahīñ

maiñ kahīñ jā.ūñ mere ham-rah us kī yaad hai

tum mujhe tanhā samajhte ho to maiñ tanhā nahīñ

ho sake to aap rakhiye apne aiboñ par nazar

dūsroñ kī ḳhāmiyoñ par tabsira achchhā nahīñ

kis qadar badla hai mujh ko vaqt ne hālāt ne

aa.ina hai sāmne lekin merā chehra nahīñ

duur tak miltā nahīñ hai us meñ āshiq kā vajūd

ishq aisī dhuup hai jis meñ koī saaya nahīñ

shām-e-ġham so jā.ūñ tujh ko saath le kar sub.h tak

apne va.ade par use aanā thā vo aayā nahīñ

be-ḳhabar be-samt hī apnā rahā hai ye safar

jā rahe haiñ ham kidhar ḳhud ko bhī batlāyā nahīñ

is qadar begānagī ḳhud se rahī hai umr bhar

apne hāl-e-zār par 'arpit' kabhī sochā nahīñ

hai tajjub aaj tak bhi ishq kyon ruswa nahin

dard be-awaz sa hai gham ka bhi saya nahin

jo hua anjam diwane ka wo hota nahin

wo samajh jata magar kuchh hum ne samjhaya nahin

mere kamre ki bhi diwaron se ye puchhe koi

koi kya jaane ki main kyon raat bhar soya nahin

main kahin jaun mere ham-rah us ki yaad hai

tum mujhe tanha samajhte ho to main tanha nahin

ho sake to aap rakhiye apne aibon par nazar

dusron ki KHamiyon par tabsira achchha nahin

kis qadar badla hai mujh ko waqt ne haalat ne

aaina hai samne lekin mera chehra nahin

dur tak milta nahin hai us mein aashiq ka wajud

ishq aisi dhup hai jis mein koi saya nahin

sham-e-gham so jaun tujh ko sath le kar subh tak

apne wade par use aana tha wo aaya nahin

be-KHabar be-samt hi apna raha hai ye safar

ja rahe hain hum kidhar KHud ko bhi batlaya nahin

is qadar beganagi KHud se rahi hai umr bhar

apne haal-e-zar par 'arpit' kabhi socha nahin