hai to pagDanDi nazar mein moatabar alfaz ki

hai to pagDanDī nazar meñ mo'atabar alfāz kī

le ke jā.egī kahāñ tak rahguzar alfāz kī

is se aage sirf to hai aur ma.ānī kā tilism

ab koī hikmat na hogī kārgar alfāz kī

kis galī meñ chhoḌ kar ruḳhsat huī parchhā.iyāñ

maiñ huuñ aur bebas sadā.eñ dar-ba-dar alfāz kī

ḳhāmushī ke in hare peḌoñ pe jaane kyā banī

āriyāñ chaltī sunī haiñ raat bhar alfāz kī

aur ik jazbe ne kāġhaz par abhī toḌā hai dam

rah ga.iiñ sab koshisheñ phir be-asar alfāz kī

tum ne jo pichhlī rutoñ meñ bo diye the harf kuchh

fasl ug aa.ī hai dekho bā-samar alfāz kī

hosh vāloñ ne use āḳhir mohazzab kar diyā

vo jo be-ḳhabarī thī laatī thī ḳhabar alfāz kī

jism se bāhar nikal aa.ī numā.ish ke liye

ḳhud-numā.ī kī havas thī kis qadar alfāz kī

hai to pagDanDi nazar mein mo'atabar alfaz ki

le ke jaegi kahan tak rahguzar alfaz ki

is se aage sirf to hai aur maani ka tilism

ab koi hikmat na hogi kargar alfaz ki

kis gali mein chhoD kar ruKHsat hui parchhaiyan

main hun aur bebas sadaen dar-ba-dar alfaz ki

KHamushi ke in hare peDon pe jaane kya bani

aariyan chalti suni hain raat bhar alfaz ki

aur ek jazbe ne kaghaz par abhi toDa hai dam

rah gain sab koshishen phir be-asar alfaz ki

tum ne jo pichhli ruton mein bo diye the harf kuchh

fasl ug aai hai dekho ba-samar alfaz ki

hosh walon ne use aaKHir mohazzab kar diya

wo jo be-KHabari thi lati thi KHabar alfaz ki

jism se bahar nikal aai numaish ke liye

KHud-numai ki hawas thi kis qadar alfaz ki