hai wahi manzar-e-KHun-rang jahan tak dekhun

hai vahī manzar-e-ḳhūñ-rañg jahāñ tak dekhūñ

maiñ faqat ek hī tasvīr kahāñ tak dekhūñ

niiñd TuuTī hai mire ḳhvāb kahāñ TuuTe haiñ

aks terā hī haqīqat se gumāñ tak dekhūñ

itnī vus.at se mirī qalb-o-nazar ko maulā

aañkh sahrā pe dharūñ āb-e-ravāñ tak dekhūñ

rut koī aa.e kabhī phuul khilāne vaalī

kab talak aag har ik sahn-o-makāñ tak dekhūñ

aa.ina hote hue apnā uruuj aur zavāl

matla.a-e-sub.h se maġhrib kī azaañ tak dekhūñ

baad allāh ke vo hai mirī shah-rag ke qarīb

kab mire dil kī sadā jaatī hai maañ tak dekhūñ

dil kī dahlīz hī se lauT gayā vo 'raḳhshāñ'

chāhtī thī maiñ jise jism se jaañ tak dekhūñ

hai wahi manzar-e-KHun-rang jahan tak dekhun

main faqat ek hi taswir kahan tak dekhun

nind TuTi hai mere KHwab kahan TuTe hain

aks tera hi haqiqat se guman tak dekhun

itni wusat se meri qalb-o-nazar ko maula

aankh sahra pe dharun aab-e-rawan tak dekhun

rut koi aae kabhi phul khilane wali

kab talak aag har ek sahn-o-makan tak dekhun

aaina hote hue apna uruj aur zawal

matla-e-subh se maghrib ki azan tak dekhun

baad allah ke wo hai meri shah-rag ke qarib

kab mere dil ki sada jati hai man tak dekhun

dil ki dahliz hi se lauT gaya wo 'raKHshan'

chahti thi main jise jism se jaan tak dekhun