hai ye to KHizan ne rup bhara hum jis ko bahaaran kahte hain

hai ye to ḳhizāñ ne ruup bharā ham jis ko bahārāñ kahte haiñ

bas ek nazar kā dhokā hai sab jis ko gulistāñ kahte haiñ

izzat bhī hai daulat bhī par ādamiyat kā naam nahīñ

ham kis ko hindū kahte haiñ ham kis ko musalmāñ kahte haiñ

kuchh der ho to ham sabr kareñ andher nahīñ dekhā jaatā

hai apne ghar meñ aag lagī sab jis ko charāġhāñ kahte haiñ

ai saath safar karne vaalo Thahro na yahāñ aage ko baḌho

ham jis ko manzil samjhe haiñ sab bhūl-bhulayyāñ kahte haiñ

jab aql mujhe samjhātī hai behosh na ho nādān na ban

dil se ġham-e-jānāñ kahtā hai us ko ġham-e-daurāñ kahte haiñ

haiñ dafn yahāñ daulat vaale tāqat vaale izzat vaale

qudrat kā dafīna hai jis ko ham gor-e-ġharībāñ kahte haiñ

pī ġhāfil ab parhez na kar kuchh talḳh sahī kuchh tez sahī

le de ke yahī hai ek davā-e-gardish-e-daurāñ kahte haiñ

maiḳhāne ke phere kartā hai ab vaa.iz 'beḳhud' sunte haiñ

us ne bhī shāyad bāñdh liyā paimāne se paimāñ kahte haiñ

hai ye to KHizan ne rup bhara hum jis ko bahaaran kahte hain

bas ek nazar ka dhoka hai sab jis ko gulistan kahte hain

izzat bhi hai daulat bhi par aadamiyat ka nam nahin

hum kis ko hindu kahte hain hum kis ko musalman kahte hain

kuchh der ho to hum sabr karen andher nahin dekha jata

hai apne ghar mein aag lagi sab jis ko charaghan kahte hain

ai sath safar karne walo Thahro na yahan aage ko baDho

hum jis ko manzil samjhe hain sab bhul-bhulayyan kahte hain

jab aql mujhe samjhati hai behosh na ho nadan na ban

dil se gham-e-jaanan kahta hai us ko gham-e-dauran kahte hain

hain dafn yahan daulat wale taqat wale izzat wale

qudrat ka dafina hai jis ko hum gor-e-ghariban kahte hain

pi ghafil ab parhez na kar kuchh talKH sahi kuchh tez sahi

le de ke yahi hai ek dawa-e-gardish-e-dauran kahte hain

maiKHane ke phere karta hai ab waiz 'beKHud' sunte hain

us ne bhi shayad bandh liya paimane se paiman kahte hain