hai zamane ka karobar wahi

hai zamāne kā kārobār vahī

ravish-e-bazm-e-rozgār vahī

tum ga.e ho to kuchh nahīñ badlā

phuul vaise hī haiñ bahār vahī

roz chaltā huuñ tum nahīñ hote

peḌ do-rūya rahguzār vahī

manzil-e-shauq bhī nahīñ badlī

rahguzar bhī vahī ġhubār vahī

haañ koī daaġh bhī nayā na milā

hasratoñ kā bhī hai shumār vahī

haañ vo sahrā bhī kuchh nahīñ badlā

garm sūraj vahī hai ḳhaar vahī

ab hai ye haal bas ki jiite haiñ

zinda rahne kā hai shi.ār vahī

dekhtī sab haiñ aur āñkhoñ meñ

ḳhvāb vaise hī ashk-bār vahī

hai zamane ka karobar wahi

rawish-e-bazm-e-rozgar wahi

tum gae ho to kuchh nahin badla

phul waise hi hain bahaar wahi

roz chalta hun tum nahin hote

peD do-ruya rahguzar wahi

manzil-e-shauq bhi nahin badli

rahguzar bhi wahi ghubar wahi

han koi dagh bhi naya na mila

hasraton ka bhi hai shumar wahi

han wo sahra bhi kuchh nahin badla

garm suraj wahi hai KHar wahi

ab hai ye haal bas ki jite hain

zinda rahne ka hai shiar wahi

dekhti sab hain aur aankhon mein

KHwab waise hi ashk-bar wahi