haibat-e-husn se alfaz ki hairani tak

haibat-e-husn se alfāz kī hairānī tak

baat pahuñchī thī abhī chāñd kī peshānī tak

aap kyā dirham-o-dīnār liye phirte haiñ

ham to Thukrā bhī chuke taḳht-e-sulaimānī tak

vasl ke qisse to tamhīd haiñ sunte rahiye

baat pahuñchegī abhī quvvat-e-īmānī tak

qissa-e-rafta mukammal nahīñ hogā varna

zikr jaarī rahe aqdār kī arzānī tak

aap mohsin haiñ magar khel kī majbūrī hai

dil to aatā hī nahīñ raah meñ sultānī tak

us ne kuchh soch ke sahrā kī taraf moḌ diyā

pyaas bas pahuñchne vaalī thī abhī paanī tak

daf.atan vaqt ne raftār baḌhā dī varna

bhāgtā maiñ bhī rahā ik had-e-imkānī tak

haibat-e-husn se alfaz ki hairani tak

baat pahunchi thi abhi chand ki peshani tak

aap kya dirham-o-dinar liye phirte hain

hum to Thukra bhi chuke taKHt-e-sulaimani tak

wasl ke qisse to tamhid hain sunte rahiye

baat pahunchegi abhi quwwat-e-imani tak

qissa-e-rafta mukammal nahin hoga warna

zikr jari rahe aqdar ki arzani tak

aap mohsin hain magar khel ki majburi hai

dil to aata hi nahin rah mein sultani tak

us ne kuchh soch ke sahra ki taraf moD diya

pyas bas pahunchne wali thi abhi pani tak

dafatan waqt ne raftar baDha di warna

bhagta main bhi raha ek had-e-imkani tak