haidar tumhaara zauq-e-tamanna tha kya hua

'haidar' tumhārā zauq-e-tamannā thā kyā huā

tum pe bhī ek jism to utrā thā kyā huā

miltī hai zindagī to yahī pūchhtī hai bas

vo ḳhud-kushī kā ḳhvāb jo dekhā thā kyā huā

sar āñkhoñ par hai terī nasīhat magar ai dost

tū ne bhī ek shaḳhs ko chāhā thā kyā huā

ik maslahat hai parda-garī itnī zid na kar

muusā aḌe the zid pe to dekhā thā kyā huā

maiñ bad-havās rahne lagā thā tumhāre baa'd

kuchh saal to samajh hī na aayā thā kyā huā

'haidar' tumhaara zauq-e-tamanna tha kya hua

tum pe bhi ek jism to utra tha kya hua

milti hai zindagi to yahi puchhti hai bas

wo KHud-kushi ka KHwab jo dekha tha kya hua

sar aankhon par hai teri nasihat magar ai dost

tu ne bhi ek shaKHs ko chaha tha kya hua

ek maslahat hai parda-gari itni zid na kar

musa aDe the zid pe to dekha tha kya hua

main bad-hawas rahne laga tha tumhaare ba'd

kuchh sal to samajh hi na aaya tha kya hua