hain dagh-ha-e-gham to ujalon ke silsile

haiñ dāġh-hā-e-ġham to ujāloñ ke silsile

jaise bisāt-e-shab pe charāġhoñ ke silsile

sahrā-e-tishnagī meñ huuñ kāsa-ba-dast meñ

nazroñ ke sāmne haiñ sarāboñ ke silsile

har samt ḳhār-o-ḳhas kī haiñ dāman-darāziyāñ

milte nahīñ kahīñ bhī gulāboñ ke silsile

anjām sab kā ek hai bahr-e-hayāt meñ

hoñ dil kī hasrateñ ki habāboñ ke silsile

tārīkiyoñ kī dhund se miltī nahīñ najāt

hoñ laakh āsmāñ pe sitāroñ ke silsile

vo din bhī yaad haiñ hameñ 'bahzād' jabki the

marbūt gulsitāñ se bahāroñ ke silsile

hain dagh-ha-e-gham to ujalon ke silsile

jaise bisat-e-shab pe charaghon ke silsile

sahra-e-tishnagi mein hun kasa-ba-dast mein

nazron ke samne hain sarabon ke silsile

har samt KHar-o-KHas ki hain daman-daraaziyan

milte nahin kahin bhi gulabon ke silsile

anjam sab ka ek hai bahr-e-hayat mein

hon dil ki hasraten ki hababon ke silsile

tarikiyon ki dhund se milti nahin najat

hon lakh aasman pe sitaron ke silsile

wo din bhi yaad hain hamein 'bahzad' jabki the

marbut gulsitan se bahaaron ke silsile