hain dil jigar hamare ye mahr-o-mah donon

haiñ dil jigar hamāre ye mahr-o-māh donoñ

pahuñche haiñ āsmāñ pe ham-rāh-e-āh donoñ

hai bazm-e-be-vafā.ī raunaq-e-pazīr in se

raushan raheñ ye terī chashm-e-siyāh donoñ

ai turk-e-chashm terī ḳhūñ-rezī-e-mizha se

pīTeñ haiñ sar gunahgār aur be-gunāh donoñ

bīmār dil ke hamdam ik dard-o-ġham the so bhī

bahr-ayādat aate haiñ gaah gaah donoñ

koī zulf ko kahe zulf kākul ko samjhe kākul

apnī nazar meñ to haiñ mār-e-siyāh donoñ

tanhā kaTegī kyuuñ kar ai sail-e-ashk kah tū

hamdam dil o jigar the ho ga.e tabāh donoñ

kyā shaiḳh kyā barahman haiñ pher meñ duī ke

gumrāh ho ga.e haiñ bhūle haiñ raah donoñ

hain dil jigar hamare ye mahr-o-mah donon

pahunche hain aasman pe ham-rah-e-ah donon

hai bazm-e-be-wafai raunaq-e-pazir in se

raushan rahen ye teri chashm-e-siyah donon

ai turk-e-chashm teri KHun-rezi-e-mizha se

piTen hain sar gunahgar aur be-gunah donon

bimar dil ke hamdam ek dard-o-gham the so bhi

bahr-ayaadat aate hain gah gah donon

koi zulf ko kahe zulf kakul ko samjhe kakul

apni nazar mein to hain mar-e-siyah donon

tanha kaTegi kyun kar ai sail-e-ashk kah tu

hamdam dil o jigar the ho gae tabah donon

kya shaiKH kya barahman hain pher mein dui ke

gumrah ho gae hain bhule hain rah donon