hain hamin dard ki shiddat se nikhaare hue log

haiñ hamīñ dard kī shiddat se nikhāre hue log

tum ne dekhe haiñ kahāñ jiit ke haare hue log

saare hī hijr-zada ḳhvāb kī tā'bīr meñ gum

saare hī ḳhvāb kī duniyā se guzāre hue log

ek ham hī to nahīñ dard-e-shikasta kī misāl

ek ham hī to nahīñ pyaar ke maare hue log

ab kisī tark-e-ta'alluq kā gila hai na malāl

dil meñ rahte haiñ kahāñ dil se utāre hue log

yaad ke abr meñ chamkā koī bhaTkā jugnū

chāñd kī diid meñ jaage to sitāre hue log

dil kī pathrā.ī huī aañkh meñ dariyā chup thā

aur dariyā kā chalan dekh kināre hue log

dard kī jhiil meñ qisse the tah-e-āb-e-ravāñ

jab sune ham se zabānī to hamāre hue log

aaj kāñToñ se bharā laakh ho dāman apnā

the kabhī ham bhī 'ġhazal' phuul se vaare hue log

hain hamin dard ki shiddat se nikhaare hue log

tum ne dekhe hain kahan jit ke haare hue log

sare hi hijr-zada KHwab ki ta'bir mein gum

sare hi KHwab ki duniya se guzare hue log

ek hum hi to nahin dard-e-shikasta ki misal

ek hum hi to nahin pyar ke mare hue log

ab kisi tark-e-ta'alluq ka gila hai na malal

dil mein rahte hain kahan dil se utare hue log

yaad ke abr mein chamka koi bhaTka jugnu

chand ki did mein jage to sitare hue log

dil ki pathrai hui aankh mein dariya chup tha

aur dariya ka chalan dekh kinare hue log

dard ki jhil mein qisse the tah-e-ab-e-rawan

jab sune hum se zabani to hamare hue log

aaj kanTon se bhara lakh ho daman apna

the kabhi hum bhi 'ghazal' phul se ware hue log