hain lapata zamane se sare ke sare KHwab

haiñ lāpata zamāne se saare ke saare ḳhvāb

kis ke badan se lipTe hue haiñ hamāre ḳhvāb

maiñ shaam kī balā.eñ luuñ yā bosa sub.h kā

bikhre paḌe haiñ raat ke donoñ kināre ḳhvāb

tum chhat pe aate jaate rahoge isī tarah

to dekhne lageñge sabhī ke sitāre ḳhvāb

maanā sajā-sañvār ke bheje ga.e ho tum

ā.īne bhī to dekh rahe haiñ tumhāre ḳhvāb

apnī to saarī umr pas-o-pesh meñ kaTī

sau baar zeb-e-tan kiye sau baar utāre ḳhvāb

nazreñ bhī kyā guzārte ham boriyā-nashīñ

us ne bhī sarfarāz kiye sab guzāre ḳhvāb

mushkil ye aa paḌī hai ki kis des jā.eñge

ham tār-tār log liye itne saare ḳhvāb

hain lapata zamane se sare ke sare KHwab

kis ke badan se lipTe hue hain hamare KHwab

main sham ki balaen lun ya bosa subh ka

bikhre paDe hain raat ke donon kinare KHwab

tum chhat pe aate jate rahoge isi tarah

to dekhne lagenge sabhi ke sitare KHwab

mana saja-sanwar ke bheje gae ho tum

aaine bhi to dekh rahe hain tumhaare KHwab

apni to sari umr pas-o-pesh mein kaTi

sau bar zeb-e-tan kiye sau bar utare KHwab

nazren bhi kya guzarte hum boriya-nashin

us ne bhi sarfaraaz kiye sab guzare KHwab

mushkil ye aa paDi hai ki kis des jaenge

hum tar-tar log liye itne sare KHwab