hain sau tarah ke rang har ek naqsh-e-pa mein dekh

haiñ sau tarah ke rañg har ik naqsh-e-pā meñ dekh

insāñ kā husn ā.ina-e-irtiqā meñ dekh

yuuñ hī nahīñ ye bartarī-e-nasl-e-ādmī

guzre haiñ kaise hādse sa.ī-e-baqā meñ dekh

sarf-e-nazar haiñ vaqt kī pinhā.iyāñ tamām

duniyā-e-nā-rasā mirī fikr-e-rasā meñ dekh

ye raushnī to lau hai isī ik charāġh kī

taz.īn-e-dahr zehn kī nash-o-numā meñ dekh

is kārobār jān-o-jasad par nigāh Daal

haiñ kaisī kaisī ne.amateñ āb-o-havā meñ dekh

yaañ kitne log mar ke amar ho ga.e na pūchh

kyā sūrateñ baqā kī haiñ rāh-e-fanā meñ dekh

sun to ḳhirām-e-vaqt meñ haiñ kaisī āhaTeñ

kyā rañg pur-fishāñ haiñ ġhubār-e-havā meñ dekh

'akbar' hai ek mahshar-e-ilm-o-ḳhabar dimāġh

shor-e-hayāt ḳhāna-e-bīm-o-rajā meñ dekh

hain sau tarah ke rang har ek naqsh-e-pa mein dekh

insan ka husn aaina-e-irtiqa mein dekh

yun hi nahin ye bartari-e-nasl-e-admi

guzre hain kaise hadse sai-e-baqa mein dekh

sarf-e-nazar hain waqt ki pinhaiyan tamam

duniya-e-na-rasa meri fikr-e-rasa mein dekh

ye raushni to lau hai isi ek charagh ki

tazin-e-dahr zehn ki nash-o-numa mein dekh

is karobar jaan-o-jasad par nigah Dal

hain kaisi kaisi neamaten aab-o-hawa mein dekh

yan kitne log mar ke amar ho gae na puchh

kya suraten baqa ki hain rah-e-fana mein dekh

sun to KHiram-e-waqt mein hain kaisi aahaTen

kya rang pur-fishan hain ghubar-e-hawa mein dekh

'akbar' hai ek mahshar-e-ilm-o-KHabar dimagh

shor-e-hayat KHana-e-bim-o-raja mein dekh