hain shaKH shaKH pareshan tamam ghar mere

haiñ shāḳh shāḳh pareshāñ tamām ghar mere

kaTe paḌe haiñ baḌī duur tak shajar mere

charāġh in pe jale the bahut havā ke ḳhilāf

bujhe bujhe haiñ jabhī aaj bām-o-dar mere

hazāroñ saal kī tārīḳh likkhī jā.egī

zamīñ ke batn se ubhreñge jab khañDar mere

ye dekhnā hai ki ab haar māntā hai kaun

udhar hai vus.at-e-imkāñ idhar haiñ par mere

maiñ apnī zaat kī ta.abīr kī talāsh meñ thā

to mere ḳhvāb chale ban ke ham-safar mere

surāġh-e-mausam-e-gul ke amiin kī sūrat

khile hue haiñ ḳhizāñ meñ bhī zaḳhm-e-sar mere

hain shaKH shaKH pareshan tamam ghar mere

kaTe paDe hain baDi dur tak shajar mere

charagh in pe jale the bahut hawa ke KHilaf

bujhe bujhe hain jabhi aaj baam-o-dar mere

hazaron sal ki tariKH likkhi jaegi

zamin ke batn se ubhrenge jab khanDar mere

ye dekhna hai ki ab haar manta hai kaun

udhar hai wusat-e-imkan idhar hain par mere

main apni zat ki tabir ki talash mein tha

to mere KHwab chale ban ke ham-safar mere

suragh-e-mausam-e-gul ke amin ki surat

khile hue hain KHizan mein bhi zaKHm-e-sar mere