hairan hun nasib ki baKHshish ko dekh kar

hairān huuñ nasīb kī baḳhshish ko dekh kar

saa.e se apne dhuup meñ mahrūm haiñ shajar

qabze meñ apne hotī fazāoñ kī mamlikat

uḌte agar havāoñ kī raftār dekh kar

un se mile to ḳhud se bhī pahchān ho ga.ī

varna ham apnī zaat se ab tak the be-ḳhabar

har TukḌe meñ bas ek hī tasvīr pāoge

dekho to apnī zaat kā ā.īna toḌ kar

nashtar se log karte haiñ zaḳhm-e-jigar rafū

ye rasm to kahāñ se chalī mere chārāgar

'anjum' zamīñ se jin kī jaḌeñ rishta toḌ leñ

dekhā hai sab ne suukh ke girte haiñ vo shajar

hairan hun nasib ki baKHshish ko dekh kar

sae se apne dhup mein mahrum hain shajar

qabze mein apne hoti fazaon ki mamlikat

uDte agar hawaon ki raftar dekh kar

un se mile to KHud se bhi pahchan ho gai

warna hum apni zat se ab tak the be-KHabar

har TukDe mein bas ek hi taswir paoge

dekho to apni zat ka aaina toD kar

nashtar se log karte hain zaKHm-e-jigar rafu

ye rasm to kahan se chali mere chaaragar

'anjum' zamin se jin ki jaDen rishta toD len

dekha hai sab ne sukh ke girte hain wo shajar