hairān sī hai bhachak rahī hai
nargis kis gul ko tak rahī hai
aa.ī hai bahār ġhunche chaTke
kyā phūloñ kī bū mahak rahī hai
mai-ḳhāne pe meñh baras rahā hai
bijlī kaisī chamak rahī hai
baaqī hai asar abhī junūñ kā
saudā to gayā hai jhak rahī hai
pūchho na jalan kā dil ke ahvāl
ik aag paḌī dahak rahī hai
nargis ko to aañkh uThā ke dekho
kis yaas se tum ko tak rahī hai
lailā majnūñ kā raTtī hai naam
dīvānī huī hai bak rahī hai
paiġhām-e-bahār aan pahuñchā
bulbul kyā kyā chahak rahī hai
mizhgāñ kā jo dil meñ hai tasavvur
ik phāñs paḌī khaTak rahī hai
ho jā.egā raam rafta rafta
vahshat to miTī jhijak rahī hai
baaqī jo ye jān-e-nā-tavāñ hai
kyā zindoñ meñ hai sisak rahī hai
aane kī tire hī muntazir hai
o maut kahāñ tū thak rahī hai
kyā shoḳh hai vo sunahrī rañgat
kandan kī tarah damak rahī hai
rū-e-rañgīñ araq-fishāñ hai
shabnam gul se Tapak rahī hai
ham 'rind' haiñ bazm apnī kis raat
be-jām-e-mai o gazak rahī hai
hairan si hai bhachak rahi hai
nargis kis gul ko tak rahi hai
aai hai bahaar ghunche chaTke
kya phulon ki bu mahak rahi hai
mai-KHane pe meinh baras raha hai
bijli kaisi chamak rahi hai
baqi hai asar abhi junun ka
sauda to gaya hai jhak rahi hai
puchho na jalan ka dil ke ahwal
ek aag paDi dahak rahi hai
nargis ko to aankh uTha ke dekho
kis yas se tum ko tak rahi hai
laila majnun ka raTti hai nam
diwani hui hai bak rahi hai
paigham-e-bahaar aan pahuncha
bulbul kya kya chahak rahi hai
mizhgan ka jo dil mein hai tasawwur
ek phans paDi khaTak rahi hai
ho jaega ram rafta rafta
wahshat to miTi jhijak rahi hai
baqi jo ye jaan-e-na-tawan hai
kya zindon mein hai sisak rahi hai
aane ki tere hi muntazir hai
o maut kahan tu thak rahi hai
kya shoKH hai wo sunahri rangat
kandan ki tarah damak rahi hai
ru-e-rangin araq-fishan hai
shabnam gul se Tapak rahi hai
hum 'rind' hain bazm apni kis raat
be-jam-e-mai o gazak rahi hai
Source:
Deewan-e-Rind(Guldast-e-ishq) (Rekhta Website) (Pg. 276)
-
Author:
Rind Lakhnavi
-
- Edition: 1931
- Publisher: Munshi Nawal Kishor, Lucknow
- Year of Publication: 1930
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.