hairat ke dil pe war kiya hae kya kiya

'hairat' ke dil pe vaar kiyā haa.e kyā kiyā

ḳhud ko bhī be-qarār kiyā haa.e kyā kiyā

mujh ko na thā ḳhud apnī nigāhoñ pe e'tibār

aur us ne e'tibār kiyā haa.e kyā kiyā

jitnā hī maiñ ḳharāb huā nā-tavāñ huā

utnā hī us ne pyaar kiyā haa.e kyā kiyā

maiñ us se bad-gumāñ rahā uf ai fareb-e-ishq

aur us ne mujh ko pyaar kiyā haa.e kyā kiyā

hañs hañs ke apnā dāman-e-rañgīñ diyā mujhe

aur maiñ ne taar taar kiyā haa.e kyā kiyā

miltā thā ik nazar se mirī ruuh ko qarār

us ne bhī be-qarār kiyā haa.e kyā kiyā

'hairat' ke dil pe war kiya hae kya kiya

KHud ko bhi be-qarar kiya hae kya kiya

mujh ko na tha KHud apni nigahon pe e'tibar

aur us ne e'tibar kiya hae kya kiya

jitna hi main KHarab hua na-tawan hua

utna hi us ne pyar kiya hae kya kiya

main us se bad-guman raha uf ai fareb-e-ishq

aur us ne mujh ko pyar kiya hae kya kiya

hans hans ke apna daman-e-rangin diya mujhe

aur main ne tar tar kiya hae kya kiya

milta tha ek nazar se meri ruh ko qarar

us ne bhi be-qarar kiya hae kya kiya