hairat se dekhta hai mera naqsh-e-pa mujhe

hairat se dekhtā hai mirā naqsh-e-pā mujhe

yārān-e-tez-gām ye kyā ho gayā mujhe

ḳhud mere dil meñ shauq-e-safar hī nahīñ rahā

ab laakh bhejeñ manzileñ apnā patā mujhe

samjhā thā bas hayāt ko ḳhvāboñ kī jalva-gāh

ik dil kā daaġh kar gayā ḳhud-āshnā mujhe

paalā hai apnī god meñ tūfān ne tujhe

ai mauj us kī koī jhalak tū dikhā mujhe

ye kaun sī ḳhalish nikal aa.ī na.ī na.ī

lagtā hai aaj dard-e-jigar kuchh sivā mujhe

'az.har' mire harīf the kuchh ġham-zada magar

the yaar ḳhush ki dekh liyā Dūbtā mujhe

hairat se dekhta hai mera naqsh-e-pa mujhe

yaran-e-tez-gam ye kya ho gaya mujhe

KHud mere dil mein shauq-e-safar hi nahin raha

ab lakh bhejen manzilen apna pata mujhe

samjha tha bas hayat ko KHwabon ki jalwa-gah

ek dil ka dagh kar gaya KHud-ashna mujhe

pala hai apni god mein tufan ne tujhe

ai mauj us ki koi jhalak tu dikha mujhe

ye kaun si KHalish nikal aai nai nai

lagta hai aaj dard-e-jigar kuchh siwa mujhe

'azhar' mere harif the kuchh gham-zada magar

the yar KHush ki dekh liya Dubta mujhe