hum aariz-e-taban bhul gae gesu-e-pareshan bhul gae

ham āriz-e-tābāñ bhuul ga.e gesū-e-pareshāñ bhuul ga.e

āshob-e-sahar rañgīnī-e-shām ai gardish-e-daurāñ bhuul ga.e

kuchh tum hī kaho ai ham-qafaso mahsūs ho kyoñ be-bāl-o-parī

ab ḳhanda-e-gul kā zikr hī kyā jab ahd-e-bahārāñ bhuul ga.e

siine meñ nahīñ jab qalb gudāz ai aah kahāñ se aa.e asar

parvāz-e-duā-e-nīm-shabī ham ashk-ba-dāmāñ bhuul ga.e

āġhosh-e-havādis meñ pal kar jo log uThe the mauj-sifat

āsūda-e-sāhil aise hue hangāma-e-tūfāñ bhuul ga.e

phūloñ kī mahak par sausan ne ye kah ke mujhe betāb kiyā

zanjīr-e-junūñ ke taale bhī kyā qaidi-e-zindāñ bhuul ga.e

hum aariz-e-taban bhul gae gesu-e-pareshan bhul gae

aashob-e-sahar rangini-e-sham ai gardish-e-dauran bhul gae

kuchh tum hi kaho ai ham-qafaso mahsus ho kyon be-baal-o-pari

ab KHanda-e-gul ka zikr hi kya jab ahd-e-bahaaran bhul gae

sine mein nahin jab qalb gudaz ai aah kahan se aae asar

parwaz-e-dua-e-nim-shabi hum ashk-ba-daman bhul gae

aaghosh-e-hawadis mein pal kar jo log uThe the mauj-sifat

aasuda-e-sahil aise hue hangama-e-tufan bhul gae

phulon ki mahak par sausan ne ye kah ke mujhe betab kiya

zanjir-e-junun ke tale bhi kya qaidi-e-zindan bhul gae