ham ab kyā batā.eñ kahāñ tak ga.e
gumāñ ke musāfir gumāñ tak ga.e
hisār-e-jahāñ tak hai dasht-e-anā
dikhā bas ye manzar jahāñ tak ga.e
na jazbāt se ye safar tai huā
na dil se kabhī ye zabāñ tak ga.e
ki hāsil yahī mausamoñ kā rahā
bahāroñ ke patte ḳhizāñ tak ga.e
masāfat kisī kī yahīñ tak rahī
makāñ se chale to dukāñ tak ga.e
batāo qazā par kareñ aur kyā
azā se baḌheñ to fuġhāñ tak ga.e
jinheñ āgahī meñ milā aasrā
na phir vo kisī bhī amaañ tak ga.e
yūñhī bār-e-hastī uThā.e phireñ
hue ḳhaak to āsmāñ tak ga.e
hum ab kya bataen kahan tak gae
guman ke musafir guman tak gae
hisar-e-jahan tak hai dasht-e-ana
dikha bas ye manzar jahan tak gae
na jazbaat se ye safar tai hua
na dil se kabhi ye zaban tak gae
ki hasil yahi mausamon ka raha
bahaaron ke patte KHizan tak gae
masafat kisi ki yahin tak rahi
makan se chale to dukan tak gae
batao qaza par karen aur kya
aza se baDhen to fughan tak gae
jinhen aagahi mein mila aasra
na phir wo kisi bhi aman tak gae
yunhi bar-e-hasti uThae phiren
hue KHak to aasman tak gae
Source:
Word File Mail By Salim Saleem
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.