hum agar dasht-e-junun mein na ghazal-KHwan hote

ham agar dasht-e-junūñ meñ na ġhazal-ḳhvāñ hote

shahr hote bhī to āvāz ke zindāñ hote

zindagī tere taqāze agar āsāñ hote

kitne ābād jazīre haiñ ki vīrāñ hote

tū ne dekhā hī nahīñ pyaar se zarroñ kī taraf

aañkh hotī to sitāre bhī numāyāñ hote

ārzūoñ se jo paimān-e-vafā ham rakhte

sānehe zaḳhm bhī hote to gulistāñ hote

ishq hī sho.ala-e-imkān-e-sahar hai varna

ḳhvāb ta.abīr se pahle hī pareshāñ hote

māzī-o-dosh kā har daaġh hai fardā kā charāġh

kaash ye shām-o-sahar sirf dil-o-jāñ hote

zabt-e-tūfāñ kī tabī.at hī kā ik ruḳh hai 'zamīr'

mauj āvāz badal letī hai tūfāñ hote

hum agar dasht-e-junun mein na ghazal-KHwan hote

shahr hote bhi to aawaz ke zindan hote

zindagi tere taqaze agar aasan hote

kitne aabaad jazire hain ki viran hote

tu ne dekha hi nahin pyar se zarron ki taraf

aankh hoti to sitare bhi numayan hote

aarzuon se jo paiman-e-wafa hum rakhte

sanehe zaKHm bhi hote to gulistan hote

ishq hi shoala-e-imkan-e-sahar hai warna

KHwab tabir se pahle hi pareshan hote

mazi-o-dosh ka har dagh hai farda ka charagh

kash ye sham-o-sahar sirf dil-o-jaan hote

zabt-e-tufan ki tabiat hi ka ek ruKH hai 'zamir'

mauj aawaz badal leti hai tufan hote