hum ahl-e-zarf ki gham-KHana-e-hunar mein rahe

ham ahl-e-zarf ki ġham-ḳhāna-e-hunar meñ rahe

sifāl-e-nam kī tarah dast-e-kūza-gar meñ rahe

farār mil na sakā habs-e-jism-o-jāñ se ki ham

tilism-ḳhāna-e-takrār-e-ḳhair-o-shar meñ rahe

kisī ko qurb-e-musalsal kā hausla na huā

misāl-e-dūd-e-pareshāñ ham apne ghar meñ rahe

na sañg-e-mīl thā koī na koī naqsh-e-qadam

tamām umr havā kī tarah safar meñ rahe

na ham sharār-e-dil-e-sañg the na rañg-e-hinā

suḳhan kī aag bane harf-e-tāza-tar meñ rahe

vo log jin kī zabāñ sho.ala-e-tamanna thī

savāl ban ke zamāne kī chashm-e-tar meñ rahe

hum ahl-e-zarf ki gham-KHana-e-hunar mein rahe

sifal-e-nam ki tarah dast-e-kuza-gar mein rahe

farar mil na saka habs-e-jism-o-jaan se ki hum

tilism-KHana-e-takrar-e-KHair-o-shar mein rahe

kisi ko qurb-e-musalsal ka hausla na hua

misal-e-dud-e-pareshan hum apne ghar mein rahe

na sang-e-mil tha koi na koi naqsh-e-qadam

tamam umr hawa ki tarah safar mein rahe

na hum sharar-e-dil-e-sang the na rang-e-hina

suKHan ki aag bane harf-e-taza-tar mein rahe

wo log jin ki zaban shoala-e-tamanna thi

sawal ban ke zamane ki chashm-e-tar mein rahe