hum apni haqiqat se mukar jaenge ek din

ham apnī haqīqat se mukar jā.eñge ik din

kitnī bhī du'ā.eñ do pa mar jā.eñge ik din

harkat meñ har ik shai kī guzarne kā 'amal hai

ham ko bhī guzarnā hai guzar jā.eñge ik din

har sā’at-e-ā.inda is ummīd pe aa.ī

hālāt haiñ hālāt sañvar jā.eñge ik din

kuchh ḳhvāb haiñ āñkhoñ meñ to kuchh dil meñ umangeñ

ye sāġhar-o-mīnā bhī to bhar jā.eñge ik din

yuuñ hai ki bas ik silsila-e-radd-e-nafī hai

lagtā hai ki tum se bhī mukar jā.eñge ik din

'anjum' tū jahāñ jā ke abhī gosha-nashīñ hai

milne ko tujhe ahl-e-nazar jā.eñge ik din

hum apni haqiqat se mukar jaenge ek din

kitni bhi du'aen do pa mar jaenge ek din

harkat mein har ek shai ki guzarne ka 'amal hai

hum ko bhi guzarna hai guzar jaenge ek din

har sa’at-e-ainda is ummid pe aai

haalat hain haalat sanwar jaenge ek din

kuchh KHwab hain aankhon mein to kuchh dil mein umangen

ye saghar-o-mina bhi to bhar jaenge ek din

yun hai ki bas ek silsila-e-radd-e-nafi hai

lagta hai ki tum se bhi mukar jaenge ek din

'anjum' tu jahan ja ke abhi gosha-nashin hai

milne ko tujhe ahl-e-nazar jaenge ek din