hum apni kahani bhul gae hum apna fasana bhul gae

ham apnī kahānī bhuul ga.e ham apnā fasānā bhuul ga.e

aisā ye zamāna rañg laayā ham hañsnā-hañsānā bhuul ga.e

bulbul kā chahaknā yaad rahā phūloñ kā mahaknā yaad rahā

apnī hī haqīqat yaad nahīñ apnā hī tarānā bhuul ga.e

mai-ḳhāne kī rāteñ yaad aa.iiñ but-ḳhāne kī bāteñ yaad aa.iiñ

pahuñche jo haram kī chaukhaT par sar apnā jhukānā bhuul ga.e

ye zulm-o-sitam ke matvāle insāf kā da.avā karte haiñ

deñ kis ko sazā hai kis kī ḳhatā ye ahl-e-zamāna bhuul ga.e

āġhāz-e-jafā kī talḳhī se ghabrānā bhī ik nādānī hai

un par bhī koī vaqt aa.egā vo apnā zamāna bhuul ga.e

saaqī hai judā maiḳhāne se sāġhar hai judā paimāne se

hastī ke talātum meñ phañs kar sab pīnā-pilānā bhuul ga.e

ulfat kī qasam is duniyā meñ ab koī kisī kā bhī na rahā

begānoñ kā shikva kyā kiije apne apnānā bhuul ga.e

hai sham.a ḳhafā parvāne se sāġhar hai ḳhajil paimāne se

uThtā hai dhuāñ maiḳhāne se sab pīnā-pilānā bhuul ga.e

ik sāz-e-shikasta le ke 'nasīm' us gulshan meñ kyā jaa.eñ ki ham

bulbul ko rulānā bhuul ga.e phūloñ ko hañsānā bhuul ga.e

hum apni kahani bhul gae hum apna fasana bhul gae

aisa ye zamana rang laya hum hansna-hansana bhul gae

bulbul ka chahakna yaad raha phulon ka mahakna yaad raha

apni hi haqiqat yaad nahin apna hi tarana bhul gae

mai-KHane ki raaten yaad aain but-KHane ki baaten yaad aain

pahunche jo haram ki chaukhaT par sar apna jhukana bhul gae

ye zulm-o-sitam ke matwale insaf ka dawa karte hain

den kis ko saza hai kis ki KHata ye ahl-e-zamana bhul gae

aaghaz-e-jafa ki talKHi se ghabrana bhi ek nadani hai

un par bhi koi waqt aaega wo apna zamana bhul gae

saqi hai juda maiKHane se saghar hai juda paimane se

hasti ke talatum mein phans kar sab pina-pilana bhul gae

ulfat ki qasam is duniya mein ab koi kisi ka bhi na raha

beganon ka shikwa kya kije apne apnana bhul gae

hai shama KHafa parwane se saghar hai KHajil paimane se

uThta hai dhuan maiKHane se sab pina-pilana bhul gae

ek saz-e-shikasta le ke 'nasim' us gulshan mein kya jaen ki hum

bulbul ko rulana bhul gae phulon ko hansana bhul gae