hum apni ruh ke upar azab dekhte hain

ham apnī ruuh ke uupar azaab dekhte haiñ

ki roz tujh se bichhaḌne kā ḳhvāb dekhte haiñ

kabhī kabhī to hameñ bhī yaqīñ nahīñ aatā

ki ham bahār meñ jalte gulāb dekhte haiñ

tumhārī chashm-e-tamannā ko dekhne vaale

koī ḳhazāna-e-ġham zer-e-āb dekhte haiñ

bas ek aas ke rishte pe umr kaTtī hai

ki ḳhushk peḌ musalsal sarāb dekhte haiñ

jahāñ junūñ kī tamāzat pe harf aatā ho

ham us maqām pe ik inqalāb dekhte haiñ

hamāre qad kā tum andāza kyā lagāoge

ham aañkh muuñd ke sahrā meñ aab dekhte haiñ

ye shahr-e-ishq to 'āfāq' ho nahīñ saktā

ham is ilāqe kā mausam ḳharāb dekhte haiñ

hum apni ruh ke upar azab dekhte hain

ki roz tujh se bichhaDne ka KHwab dekhte hain

kabhi kabhi to hamein bhi yaqin nahin aata

ki hum bahaar mein jalte gulab dekhte hain

tumhaari chashm-e-tamanna ko dekhne wale

koi KHazana-e-gham zer-e-ab dekhte hain

bas ek aas ke rishte pe umr kaTti hai

ki KHushk peD musalsal sarab dekhte hain

jahan junun ki tamazat pe harf aata ho

hum us maqam pe ek inqalab dekhte hain

hamare qad ka tum andaza kya lagaoge

hum aankh mund ke sahra mein aab dekhte hain

ye shahr-e-ishq to 'afaq' ho nahin sakta

hum is ilaqe ka mausam KHarab dekhte hain