hum be-gharon ke dil mein jagati hai Dar gali

ham be-gharoñ ke dil meñ jagātī hai Dar galī

sotī hai aadhī raat ko jab be-ḳhabar galī

mujh ko to jān-būjh ke bhaTkā diyā gayā

sarkār kā makān kahāñ aur kidhar galī

kuchh saal qabl mere bhī hisse meñ aa.ī thī

ik dil-nashīn shaam aur ik muntazar galī

chal to paḌā huuñ shauq-e-makāñ meñ tire magar

aage se band ye bhī milegī agar galī

siine se terī yaad lagā kar maiñ so gayā

har-chand shor kartī rahī rāt-bhar galī

ik arse ba.ad udhar se jo merā guzar huā

tum bin sabhī udaas mile ḳhaas kar galī

anjān shahr meñ thā akelā nikal paḌā

'zīshān' tujh ko zehn meñ rakhnī thī har galī

hum be-gharon ke dil mein jagati hai Dar gali

soti hai aadhi raat ko jab be-KHabar gali

mujh ko to jaan-bujh ke bhaTka diya gaya

sarkar ka makan kahan aur kidhar gali

kuchh sal qabl mere bhi hisse mein aai thi

ek dil-nashin sham aur ek muntazar gali

chal to paDa hun shauq-e-makan mein tere magar

aage se band ye bhi milegi agar gali

sine se teri yaad laga kar main so gaya

har-chand shor karti rahi raat-bhar gali

ek arse baad udhar se jo mera guzar hua

tum bin sabhi udas mile KHas kar gali

anjaan shahr mein tha akela nikal paDa

'zishan' tujh ko zehn mein rakhni thi har gali