hum chal diye aur dost hamara nahin aaya

ham chal diye aur dost hamārā nahīñ aayā

kashtī ke ta'āqub meñ kināra nahīñ aayā

pahuñchā baḌe armān liye dasht-e-falak tak

hāthoñ meñ magar ek bhī taarā nahīñ aayā

kyā sāniha guzrā mire rahgīr pe logo

kyoñ ḳhair-ḳhabar ko vo dubāra nahīñ aayā

ham lauT ga.e jaise palaTte haiñ parinde

har-chand kisī dar kā ishāra nahīñ aayā

jab aa.e safar se to rah-e-'ishq meñ 'sarvat'

vo dasht vo bastī vo manāra nahīñ aayā

hum chal diye aur dost hamara nahin aaya

kashti ke ta'aqub mein kinara nahin aaya

pahuncha baDe arman liye dasht-e-falak tak

hathon mein magar ek bhi tara nahin aaya

kya saniha guzra mere rahgir pe logo

kyon KHair-KHabar ko wo dubara nahin aaya

hum lauT gae jaise palaTte hain parinde

har-chand kisi dar ka ishaara nahin aaya

jab aae safar se to rah-e-'ishq mein 'sarwat'

wo dasht wo basti wo manara nahin aaya