hum dil ki tabahi ka ye saman na karenge

ham dil kī tabāhī kā ye sāmāñ na kareñge

is ghar meñ kisī aur ko mehmāñ na kareñge

ghabrā ke kabhī chaak girebāñ na kareñge

badnām tujhe fasl-e-bahārāñ na kareñge

mish.al ko charāġh-e-tah-e-dāmāñ na kareñge

jo daaġh haiñ siine meñ vo pinhāñ na kareñge

Takrā.eñge tere liye har mauj-e-balā se

sāhil pe khaḌe shikva-e-tūfāñ na kareñge

ai vo ki tirī yaad hai taskīn-e-dil-o-jāñ

hālāt hameñ kuchh bhī pareshāñ na kareñge

ye dard ki hai terī mohabbat kī amānat

mar jā.eñge is dard kā darmāñ na kareñge

ai dost mohabbat kī nazākat hai nazar meñ

ham tujh ko kisī taur pashīmāñ na kareñge

dil meñ hai tirī chaah to ai jān-e-tamannā

ham aur kisī chiiz kā armāñ na kareñge

hum dil ki tabahi ka ye saman na karenge

is ghar mein kisi aur ko mehman na karenge

ghabra ke kabhi chaak gireban na karenge

badnam tujhe fasl-e-bahaaran na karenge

mishal ko charagh-e-tah-e-daman na karenge

jo dagh hain sine mein wo pinhan na karenge

Takraenge tere liye har mauj-e-bala se

sahil pe khaDe shikwa-e-tufan na karenge

ai wo ki teri yaad hai taskin-e-dil-o-jaan

haalat hamein kuchh bhi pareshan na karenge

ye dard ki hai teri mohabbat ki amanat

mar jaenge is dard ka darman na karenge

ai dost mohabbat ki nazakat hai nazar mein

hum tujh ko kisi taur pashiman na karenge

dil mein hai teri chah to ai jaan-e-tamanna

hum aur kisi chiz ka arman na karenge