hum fikr ke KHilaf na fan ke KHilaf hain

ham fikr ke ḳhilāf na fan ke ḳhilāf haiñ

ham to suḳhan-barā.e-suḳhan ke ḳhilāf haiñ

kahte haiñ baat haqq-o-sadāqat kī barmalā

ham log zehn-o-dil kī ghuTan ke ḳhilāf haiñ

dil meñ hai kuchh zabān pe kuchh hai 'amal hai kuchh

ham aise daaġh daaġh chalan ke ḳhilāf haiñ

insāniyat kā qatl gavārā nahīñ hameñ

har farq-e-rang-o-nasl-o-vatan ke ḳhilāf haiñ

un kā sitamgarī meñ bhī koī nahīñ javāb

yuuñ vo sazā-e-dār-o-rasan ke ḳhilāf haiñ

murġhān-e-ḳhush-navā haiñ nishāna chaman chaman

har-chand log zāġh-o-zaġhan ke ḳhilāf haiñ

sarv-o-saman se kad hai to raqs-e-sabā se bair

ahl-e-chaman bahār-e-chaman ke ḳhilāf haiñ

barpā kiye haiñ aise to duniyā ne inqalāb

aur aap haiñ ki she'r-o-suḳhan ke ḳhilāf haiñ

ham se vo māñgte haiñ subūt-e-vafā 'azīz'

jo be-zamīr apne vatan ke ḳhilāf haiñ

hum fikr ke KHilaf na fan ke KHilaf hain

hum to suKHan-barae-suKHan ke KHilaf hain

kahte hain baat haqq-o-sadaqat ki barmala

hum log zehn-o-dil ki ghuTan ke KHilaf hain

dil mein hai kuchh zaban pe kuchh hai 'amal hai kuchh

hum aise dagh dagh chalan ke KHilaf hain

insaniyat ka qatl gawara nahin hamein

har farq-e-rang-o-nasl-o-watan ke KHilaf hain

un ka sitamgari mein bhi koi nahin jawab

yun wo saza-e-dar-o-rasan ke KHilaf hain

murghan-e-KHush-nawa hain nishana chaman chaman

har-chand log zagh-o-zaghan ke KHilaf hain

sarw-o-saman se kad hai to raqs-e-saba se bair

ahl-e-chaman bahaar-e-chaman ke KHilaf hain

barpa kiye hain aise to duniya ne inqalab

aur aap hain ki she'r-o-suKHan ke KHilaf hain

hum se wo mangte hain subut-e-wafa 'aziz'

jo be-zamir apne watan ke KHilaf hain