hum ishq siwa kam hain kisi nam se waqif

ham ishq sivā kam haiñ kisī naam se vāqif

na kufr ke mahram haiñ na islām se vāqif

talqīn kare arz-e-tamannā hameñ us se

mahram nahīñ hai us but-e-ḳhud-kām se vāqif

vo daur-e-visāl aah kidhar hai ki ham aur vo

duniyā meñ na the nāma-o-paiġhām se vāqif

kyā pūchho ho ham ravish-e-bāġh-o-chaman ko

ham to rahe kunj-e-qafas-o-dām se vāqif

shīrīnī-e-bosa se mazāq us kā ho phir talḳh

āshiq jo huā lazzat-e-dushnām se vāqif

bad-nām na kar ishq ko jā kaam kar apnā

hai ahl-e-havas tū nahīñ is kaam se vāqif

āġhāz-e-mohabbat ke maze ne kiyā ġhāfil

ab tak na the ham us ke bad-anjām se vāqif

hum ishq siwa kam hain kisi nam se waqif

na kufr ke mahram hain na islam se waqif

talqin kare arz-e-tamanna hamein us se

mahram nahin hai us but-e-KHud-kaam se waqif

wo daur-e-visal aah kidhar hai ki hum aur wo

duniya mein na the nama-o-paigham se waqif

kya puchho ho hum rawish-e-bagh-o-chaman ko

hum to rahe kunj-e-qafas-o-dam se waqif

shirini-e-bosa se mazaq us ka ho phir talKH

aashiq jo hua lazzat-e-dushnam se waqif

bad-nam na kar ishq ko ja kaam kar apna

hai ahl-e-hawas tu nahin is kaam se waqif

aaghaz-e-mohabbat ke maze ne kiya ghafil

ab tak na the hum us ke bad-anjam se waqif