hum jaise dil-e-muztar ki tarah zaKHmon ka mudawa kaun kare

ham jaise dil-e-muztar kī tarah zaḳhmoñ kā mudāvā kaun kare

ik chārāgar-e-dil kī ḳhātir phir turfa tamāshā kaun kare

tūfān se bachne kī ḳhātir sāhil se taqāzā kaun kare

mausam to badaltā rahtā hai mausam kā bharosa kaun kare

girdāb talātum mauj safar mastūl safīna sāhil ret

in sab se ulajhne vāloñ meñ dariyā se kināra kaun kare

kuchh kaam qanā.at se bhī lo kuchh ḳhvāb adhūre rahne do

qatre meñ samāyā ho dariyā to pyaas ko rusvā kaun kare

ālām kī afrātafrī meñ insān jiye to kaise bhalā

marnā bhī jahāñ āsān na ho jiine kī tamanna kaun kare

hai daañv par apnī jaan magar lab par na koī shikva na gila

ab ishq ke kārobār meñ bhī til bhar bhī ḳhasāra kaun kare

dil us kī taraf hai jis kī taraf duniyā hai mirī āñkheñ haiñ 'aks'

kyā is se ziyāda aur kahūñ zāhir meñ ishāra kaun kare

hum jaise dil-e-muztar ki tarah zaKHmon ka mudawa kaun kare

ek chaaragar-e-dil ki KHatir phir turfa tamasha kaun kare

tufan se bachne ki KHatir sahil se taqaza kaun kare

mausam to badalta rahta hai mausam ka bharosa kaun kare

girdab talatum mauj safar mastul safina sahil ret

in sab se ulajhne walon mein dariya se kinara kaun kare

kuchh kaam qanaat se bhi lo kuchh KHwab adhure rahne do

qatre mein samaya ho dariya to pyas ko ruswa kaun kare

aalam ki afraatafri mein insan jiye to kaise bhala

marna bhi jahan aasan na ho jine ki tamanna kaun kare

hai danw par apni jaan magar lab par na koi shikwa na gila

ab ishq ke karobar mein bhi til bhar bhi KHasara kaun kare

dil us ki taraf hai jis ki taraf duniya hai meri aankhen hain 'aks'

kya is se ziyaada aur kahun zahir mein ishaara kaun kare