hum jis ke KHayalat mein itna nikal aae

ham jis ke ḳhayālāt meñ itnā nikal aa.e

mumkin hai ki vo shaḳhs bhī tum sā nikal aa.e

Thahro abhī ummīd ke paude ko na kaaTo

mumkin hai kisī shāḳh se pattā nikal aa.e

jab ham ne shab-e-hijr meñ kī zaḳhm-shumārī

kuchh zaḳhm mohabbat ke 'alāva nikal aa.e

ik lams-e-junūñ ho jo mire dasht-e-hunar meñ

patthar se bhī ik phuul sā chehra nikal aa.e

ab tū hī batā kaise bhalā tujh ko bhulā duuñ

har shāḳh pe gar phuul bhī tujh sā nikal aa.e

hum jis ke KHayalat mein itna nikal aae

mumkin hai ki wo shaKHs bhi tum sa nikal aae

Thahro abhi ummid ke paude ko na kaTo

mumkin hai kisi shaKH se patta nikal aae

jab hum ne shab-e-hijr mein ki zaKHm-shumari

kuchh zaKHm mohabbat ke 'alawa nikal aae

ek lams-e-junun ho jo mere dasht-e-hunar mein

patthar se bhi ek phul sa chehra nikal aae

ab tu hi bata kaise bhala tujh ko bhula dun

har shaKH pe gar phul bhi tujh sa nikal aae